A VIRXE DO CRISTAL. LENDA DE CURROS ENRÍQUEZ AXEITADA PARA ÓPERA

Coa publicación deste texto rigorosamente inédito, a versión operística de A Virxe do Cristal, de Ramón Cabanillas, adaptación e recreación dun texto clásico do Rexurdimento, enriquécese a literatura galega no seu conxunto e vaise completando a inmensa obra deste poeta e dramaturgo fundamental na nosa cultura.

Esta peza, de 1924, aparece, pois, como a primeira ópera literaria galega, anterior, por tanto, a O Mariscal, constituíndose nun fito importante no desenvolvemento teatral e musical do período das Irmandades, momento fundamental no proceso de recuperación nacional do noso país.

O presente volume recolle o texto do libreto, precedido dun amplo estudo sobre a época, a obra e a lingua de Ramón Cabanillas, ao tempo que presenta como Apéndice unha outra teatralización da Lenda de Curros realizada posteriormente por Roxelio Rodríguez Díaz e publicada integramente en Buenos Aires (1948).